मुक्खमंत्री जल आत्म-निर्भरता अभियान ग्राएं च बरखा दा पानी बगियै बाह्र जाने दे बजाए ग्रां दे गै बसनीकें आसेआ जनौरें ते खेत्तरें दे कम्म आवै, इस्सै सोच कन्नै 27 जनवरी 2016 थमां मुक्खमंत्री जल आत्म-निर्भरता अभियान दी शुरूआत कीती गेई। बरखा दे पानी दी इक-इक बूंद गी सम्हालियै ग्रां गी पानी दी आत्म-निर्भरता आह्ले भेठा बधाना इस अभियान दा मूल उद्देश ऐ। पैह्ला गेड़ अभियान दे पैह्ले गेड़ च (27 जनवरी 2016 थमां 30 जून 2016 तगर) च प्रदेस दी 295 पंचैत कमेटियें दे 3 ज्हार 529 ग्राएं दा चुनां कीता गेआ। अभियान दे अंतर्गत चोनमें ग्राएं च दस्तूरी जल संरक्षण दे तरीकें जि’यां- तलाऽ, कुंड, बौलियें, छप्पड़ बगैरा दी मरम्मत कारज ते नमी तकनीक कन्नै एनकिट, टांके, मेड़बंदी बैगरा दा निर्माण कीता गेआ ऐ। इ’नें जल संरचनाएं दे कोल 26.5 लक्ख थमां मते बूह्टे बी लाए गे न कन्नै गै इ’नें बूह्टें गी अगले 5 ब’रें तगर सरंक्षण देना बी अभियान च शामल ऐ। एह्दे च जमीन संरक्षण, पंचैती राज, मनरेगा, करसान्नी, बागवानी, जंगलात, जल-आपूर्ति, जल संसाधन ते भूजल ग्रैहण बगैरा 9 सरकारी मैह्कमें, समाजक धार्मक समूहें ते आम लोकें दी हिस्सेदारी जकीनी कीती गेई ऐ। मुक्खमंत्री दी दूरदर्शी सोच ते बरखा दे पानी दे इक-इक बूंद गी सम्हालियै जमीन च भेजने दी कल्पना हून सकार रूप लैन लग्गी ऐ। अभियान दे पैह्ले गेड़ च 1270 करोड़ रपेऽ दी लागत कन्नै करीब 94 ज्हार निर्माण कारज पूरे कीते जाङन। अभियान च बनी दी जल संरचनाएं कन्नै लम्में समें लेई पानी कट्ठा होआ ऐ ते ग्रान पानी लेई आत्म-निर्भर बने न। दूआ गेड़ 9 दसंबर 2016 थमां शुरू होए दे दूऐ गेड़ च 4 ज्हार नमें ग्राएं दा चुनां कीता गेआ ते 66 शैह्रें (हर जि’ले थमां 2) गी बी अभियान च शामल कीता गेआ। शैह्री खेत्तरें च पैह्लें थमां बनी दी बौलियें, तलाएं, झीलें बगैरा दी मरमम्त कारज कीता गेआ ऐ। इस गेड़ च रूफ टाप वाटर हार्वेस्टिंग सिस्टम दे अलावा परकोलेशन टैंक बी बनाए गे न। इस गेड़ च 2100 करोड़ रपेऽ दी लागत कन्नै जल संरचनाएं च सुधार कारज करोआए गे न। त्रीआ गेड़ त्रीए गेड़ दी शुरूआत 9 दसंबर 2017 थमां होई चुकी दी ऐ। एह्दे च 4240 ग्राएं च कम्म कीता जाह्ग। इस अभियान दे तैह्त अगले ब’रें च राज्य दे 21 ज्हार ग्राएं गी लाह् पजाइयै पानी लेई आत्म-निर्भर बनाने दा लक्ष्य ऐ। बरखा दे पानी गी बगने थमां रोकने दे लाह् · सतही स्रोतें च पानी जमा होआ। · जमीन च पानी दा स्तर बधेआ। · पानी दे बगने कन्नै मिट्टी दी उप्परली सतह् दे बहाव गी रोकेआ गेआ, मिट्टी च नमीं बधी। · खेती दी पैदावर च बढ़ोतरी होई।